الا الــــجِــــذب!!

أيام قبل يوم كنا يهال كان ينون أهلنا الي يجذب.. يا ويله الي يجذب!! كنا ننطق سنة بساعة اذا أحد فينا فكر يجذب..

مو بس في البيت، للحين أذكر واحد من الربع يوم جحشه الناظر بالمدرسة لانه جذب جذبة صغيرة على المدرس وقاله انه حل الواجب..

هذي سالفتين على الطاير.. وأنا متأكد انه كل واحد فيكم عنده قصص أشكال وأرناق عن أيام الطفولة؛ لكن كلنا عقب ما كبرنا اتفقنا على النقطة الأهم:
الا الجذب!!
ايه نعم؛ الا الجذب.. ومهما حاول الجذاب انه يماطل ويلف ويدور ما رده بينكشف وينصاد وبصير منبوذ من أهله وربعه!
أرد وأقولكم:
الا الجذب!!
لكن للأسف.. مع السنين تغيرت هالقاعدة، وصار عندها استثناء وحيد بالكويت.. استثناء تفوح ريحته من الدائرة الثاني!!
ايه نعم؛ وهالاستثناء بدا يوم سوه واحد من الي يدعون الوطينة والاصلاح تعديلات بسيطة على فلم الكارتون الشهير "بينوكيو" وحوله من فلم مدته ساعة الى مسلسل مكسيكي مدته 365 يوم بالسنة..
والفرق بين بنيوكيو وهالنائب انه خشمه ما يطول.. ولا جان شفتوا خشمه من ضاحية عبدالله السالم لي حدود الزلفي!
وضحت الصورة؟؟ أكيد عرفتوا من أقصد!
النائب: مرزوق الغانم!
طيب على أي اساس تتهم مدونة بيت الشعب مرزوق بالجذب؟ ركزوا وياي بالكلام الخطير اللي بقوله!
كلنا ندري ان استجواب رئيس الوزراء الاسبوع القادم.. لكن الي يجهله الكثيرين ان الاستجواب مو بس مخوف ناصر المحمد!!
لا خبركم عتيج!!
لان استجواب الرئيس حط مرزوق جدام الأمر الواقع؛ وأمام مفترق طرق!!
يعني بالكويتي الفصيح: صار اجباري على مرزوق ان يبيع مجموعة من ربعه.. مثل ما باع عمه فؤاد من قبل!
خلوني أوضح لكم أكثر!
استجواب الرئيس راح يجبر مرزوق على أن يتخلى عن أحد الطرفين!!!
الطرف الأول: التكتل الشعبي!
أو فزاعة الرياضة ان صح التعبير؛ والمفاجأة انهم الطرف المرجح أن يتنازل عنهم مرزوق يوم الاستجواب..
واشهد يا زمن ويا متابعين مدونة بيت الشعب الأحرار على كلامي.. والوعد يوم 28-12
فبعد الفزعة الغير عادية من أعضاء التكتل الشعبي في قضية الرياضة ودخولهم في صراعات عاصفة ومدوية؛ يوم الاستجواب راح يشهد انقلاب دراماتيكي من النائب مرزوق الغانم على تكتل شعبي!
أوكي؛ الحين مادام عرفنا الطرف الاول.. منو الطرف الثاني يا شطار؟
الحكومة!
وخلوني أذكركم بحكومة ناصر محمد شسوت حق مرزوق الغانم!
الحشيش الصناعي: المناقصة الي رست على مرزوق في كل مدارس الكويت الحكومية.. وعليكم الحساب.. جم مدرسة بالكويت؟ جم مرحلة سنية؟ جم ملعب فيها.. يا سلااااااام!! الله يزيد ويبارك؛ ويقولون لي تجار بعد!
بي ام دوبليو والحكومة: انتوا انشالله عبالكم ان ربح بي ام من فلوس أهل الكويت المساكين الي كاسرة ظهورهم الاقصاد والديون؟ واعليه على هلي وربعي، صج انكم على ويهكم!
يا يُبه اصحوا!!
80% من فلوس بي ام من مناقصات الحكومة الي مسوية اتفاقية معاهم مقابل توريد سيايير لكل القضاة بمحاكم الكويت، واتفاقية اخرى تنص على توريد سيارات اخرى لكل وكلاء الوزارات.. سيايير النواب أيضا من بي ام.. تعيش بي ام ووكيلها علي ثنيان؛ وانتوا موتوا فقر!
شاحنات لوزارة الدفاع: عاد هذي قصتها قصة.. والقهر انه محد يدري عن هالموضوع بالمرة.. مناقصة رست على علي ثنيان الغانم لتوريد شاحنات ماركتها "مات" لوزارة الدفاع.. الله يزيد ويبارك!
تذكروا تاريخ الاستجواب زين: 28-12
تذكروا اليوم الي بصلع فيه مرزوق وبيكشف ولائه لناصر المحمد وحكومته! تذركوا اليوم الي بقط فيه مرزوق التكتل الشعبي بحر، مو بس عشان هالمناقصات الي مالها أول ولا تالي.. ايه نعم الاستماته الي بتصير من مروزق راح يكون مقابل صفقة أهم وأكبر من هالمناقصات.. تدرون شنو هالصفقة؟
علي ثناين الغانم
وبتشوفون التصلع على أصوله من حكومة ناصر المحمد للدفاع عن علي ثنيان الغانم على موضوع غرفة التجارة بعد هذا الاستجواب..
سجل يا تاريخ.. وتذكروا هالكلام زين يا قراء بيت الشعب الأحرار!
بسك جذب يا مرزوق، ويا ليتك قلت حق نفسك الا الجذب مثل ما قلت وياهم الا الدستور، ويا ليتك صرت مثل صويلح الملا الي حدد موقفه من الاستجواب وما رد عليك!
للحديث بقية.. تابعونا!!